وصلني طرد

وأنا أصلًا ماكنتش باخد من فلوس كريم. كان عندي شغلي. وعندي دخلي. وفي الفترة الأخيرة كنت حاطة جزء من فلوسي في مشروع صغير مع واحدة صاحبتي. يعني… لو خرج من حياتي، مش هنهار. دي كانت أول حاجة لازم أصدقها أنا قبل أي حد. لكن نجلاء قالت لي حاجة أهم: ليلى، لو فانيسا حامل فعلًا، ماينفعش تفترضي إنه الطفل من كريم. قلت: الفيديوهات… الفيديوهات تثبت علاقة، مش تثبت النسب.

والاختبار يثبت وجود حمل، مش الأب. سكت. وسألتها: يعني ممكن تكون بتكدب؟ ممكن. طب ليه تبعتلي اختبار حمل؟ عشان تستفزك. أو عشان عندها هدف. الجملة الأخيرة فضلت في دماغي. هدف. فانيسا ماكانتشي مجرد شخص عابر. كانت بتخطط. بعد يومين… جالي اتصال من رقم غريب. رديت. صوت بنت قالت: حضرتك ليلى؟ أيوه. أنا محتاجة أقابلك. مين؟

اسمي سارة. سارة مين؟ قالت: أنا كنت شغالة في شركة كريم. سكت. وعايزة أقولك حاجة عن فانيسا. اتفقت معاها في مكان هادي. جت بنت في أواخر العشرينيات. كانت متوترة جدًا. قالت: أنا مش جاية أعمل مشاكل. أنا بس مش قادرة أعيش باللي أعرفه. سألتها: تعرفي إيه؟ قالت: فانيسا مش بتحب كريم. دي بتستغله. في إيه؟ فلوس. قلبي دق. قالت: من شهور وهي بتحاول تعرف تفاصيل الشركة.

الحسابات. العقود. العملاء. كل حاجة. وكانت بتطلب من كريم ملفات. وهو كان بيديها. سألت: ليه؟ عشان كان مصدق إنها بتحبه. ضحكت بحزن. واضح إنه كان محتاج يحب نفسه الأول. سارة بصت لي. فيه حاجة تانية. إيه؟ طلعت موبايلها. وفتحت رسالة قديمة. فانيسا كانت كاتبة: أول ما كريم يخلص موضوع الانفصال، هخليه يسيب الشركة ونديرها سوا. تجمدت. سألت: عندك أكتر؟ هزت رأسها. آه. بس خاېفة. خاېفة من مين؟ قالت: فانيسا.

رجعت البيت وأنا لأول مرة حسيت إن الخېانة مش هي القضية كلها. كريم كان بيتخدع. لكن ده مايعفيهوش. لأن الشخص اللي بيخون مراته ماينفعش يقول أنا ضحية. هو اختار. كل يوم اختار. كل كڈبة اختارها. كل مرة دخل فيها بيتي واستخبى ورا كلمة شغل… كان اختياره. بعدها بأسبوع… فانيسا بدأت تتحرك. بعتت لي رسالة: واضح إنك عرفتي.

رديت: عرفت إيه؟ قالت: إن كريم اختارني. قلت: هو قالك كده؟ ردت: مش محتاجة يقول. قلت: تمام. قالت: إنتِ لازم تكوني عاقلة وتخرجي من حياته بهدوء. قرأت الرسالة. وبعدين كتبت: إنتِ متأكدة إنك عارفة كريم كويس؟ ما ردتش. بعد خمس دقائق بعتت: أنا عارفة عنه أكتر منك. قفلت الموبايل. وابتسمت. لأنها قالت الجملة اللي كنت محتاجاها. هي واثقة جدًا. والشخص الواثق زيادة… بيغلط زيادة.

بعدها بأيام… كريم دخل البيت وقال: فانيسا حامل. بصيت له. كنت عارفة. قلت: قالت لك؟ أيوه. وإنت مصدق؟ قالتلي إنها حامل مني. عملت تحليل؟ لا. يبقى إنت مصدق ليه؟ اتوتر. لأنها مش هتكذب في حاجة زي دي. ضحكت. وهي ماكدبتش عليك في حاجة قبل كده؟ سكت. كريم، إنت مش شايف إن الموضوع غريب؟ إيه الغريب؟ إنها هي اللي بعتتلي اختبار الحمل.