سلفتي

وقبل ما أخرج من المكتب، المحامي سألني هو جوزك يعرف إنك جيتي هنا؟ قلت له لأ، وأنا مش عايزاه يعرف أي حاجة لحد ما أفهم كل اللي حصل. رد عليا مفهوم، لكن احتفظي بكل المستندات، وما تواجهيش أي حد باتهام جديد قبل ما نتأكد من التفاصيل. خرجت، وروحت شغلي كأن يومي عادي. لكن الساعة اتنين الضهر، لقيت رقم غريب بيتصل بيا.

رديت، وسمعت صوت نادية. مريم، إنتِ فين؟! قلت ببرود في شغلي. خير؟ قالت بعصبية أحمد من امبارح مش عارف ينام، وأمي تعبانة من اللي حصل، وإنتِ سايبة البيت وبتلفي على المحامين! إنتِ ناوية توصلي الموضوع لفين؟! ضحكت من غير فرحة. أنا اللي سايبة البيت؟ طب وإنتوا لما كنتوا بتيجوا كل يوم تاكلوا على حسابي، وبتتكلموا عليا من ورايا، وبتاخدوا فلوسي من غير علمي، كنتوا بتوصلوا الموضوع لفين؟

سكتت ثواني، وبعدها قالت بصوت أوطى بصي يا مريم، أنا عارفة إنك زعلانة، بس فيه حاجات إنتِ مش فاهماها. أحمد ما عملش كل ده عشاني لوحدي. الجملة دي خلتني أسكت. تقصدي إيه؟ اترددت، وبعدها قالت اسألي حماتك عن الفلوس اللي اتدفعت قبل ما تتجوزي أحمد. واسأليها ليه كانت مصممة إن الشقة تتكتب باسمها هي. وقبل ما ألحق أسألها أي سؤال تاني، قفلت المكالمة.

فضلت باصة للموبايل، وأنا بحاول أفهم كلامها. فلوس قبل الجواز؟! أنا وأحمد اتجوزنا من خمس سنين، ومن يومها وأنا عمري ما سمعت إن حماتي دفعت لنا فلوس، ولا إنها ساعدتنا في شراء أي حاجة. رجعت البيت عند أمي، وفتحت صندوق صغير كنت محتفظة فيه بأوراق جوازي القديمة وإيصالات تجهيز الشقة اللي كنا ساكنين فيها. كنت بدور على أي مستند يخص الفلوس، لحد ما لقيت ظرف قديم مكتوب عليه بخط إيدي حساب تجهيزات الجواز.

فتحته، ولقيت إيصالات شراء أجهزة كهربائية، وفواتير أثاث، وورقة مطوية كنت ناسية وجودها. فتحت الورقة. كانت إيصال استلام بمبلغ كبير نسبيًا، مكتوب فيه إن أحمد استلم المبلغ من حماتي قبل جوازنا، على سبيل السلفة، وإن المبلغ هيترد على أقساط. لكن اللي صدمني مش المبلغ. اللي صدمني إن تاريخ الورقة كان قبل جوازنا بشهر واحد، وإن التوقيع الموجود في آخرها كان توقيع أحمد.

وتحت التوقيع، كانت فيه ملاحظة مكتوبة بخط مختلف يُخصم المبلغ من نصيب أحمد في الشقة المستقبلية. قعدت على السر,,ـــــير وأنا مش قادرة أستوعب. هل حماتي كانت بتحاول تسترد فلوسها فعلًا؟ ولا كانت بتستخدم الورقة دي عشان تبرر تسجيل الشقة باسمها؟ ما كنتش عايزة أظلــ,,ـــــم حد، لكن كان لازم أعرف. اتصلت بأحمد للمرة الأولى من يوم ما خرجت من البيت. رد بسرعة، وكأنه كان مستني مكالمتي من ساعات. مريم! الحمد لله إنك رديتي. إنتِ فين؟

تعالى نتكلم، وأنا هشرحلك كل حاجة. قلت له أنا لقيت إيصال قديم، مكتوب فيه إنك أخدت فلوس من أمك قبل جوازنا، وإن المبلغ هيتخصم من نصيبك في الشقة. الكلام ده صحيح؟ سكت أحمد. ثواني طويلة مرت من غير ما ينطق. وبعدين قال أيوه، صحيح. غمضت عيني وسألته طب ليه ما قلتليش؟ رد بصوت مكسور لأن أمي من وقتها وهي بتضغط عليا.