طلعت من جيبي كارت المحامي عصام، وحطيته في جيب جلابية مجدي:— شريف متكلبش في حجز قسم طنطا بتهم التزوير والسرقة، لو عندكم ذرة دم روحوا شوفوا مين اللي فضح أختكم وادعوا عليه.. هناء أمانتي ليوم الدين، والبيت ده خلاص، حسابه اتقفل. لفينا وركبنا العربية، وقبل ما أدور الماتور، مجدي وسعيد كانوا واقفين على باب البيت زي التماثيل، الندم والكسرة ماليين وشوشهم بعد ما ضيعوا بنت أصول برمشة عين عشان كدبة غريب.
لعربية خدت طريقها راجعة على القاهرة. كنت مأجر فيلا صغيرة بجنينة في التجمع، مفروشة وجاهزة على أعلى مستوى عشان نبدأ فيها حياتنا على نظيف، بعيد عن طنطا وسيرتها، وبعيد عن غدر القرايب وسواد قلوبهم. دخلنا الفيلا في المغربية، "صابر" أول ما شاف الجنينة والخضرة جرى ولعب فيها، كأنه هو التاني حاسس إن أيام الرعب والبرد في العشة الصاج انتهت للأبد.
هناء وقفت في الصالة الواسعة، بصت للحيطان النضيفة، والستاير المفرودة، وبعدين لفت وبصتلي والدموع في عينيها، بس المرة دي كانت دموع راحة وأمان.— إحنا بجد خلاص خلصنا من الكابوس ده يا خالد؟ قربت منها، ومسكت كفوف إيديها الاتنين وبوستهم:— خلص يا قلب خالد.. خلص شقا السنين، وحقك رجع بالمليم وبالكرامة وبالقانون. من هنا ورايح، مفيش غيطان، ومفيش دموع في الضلمة، ومفيش غربة هتفرقنا تاني.
. مكتبي في دبي هيديره شريكي، وأنا هفتح فرع شركتي هنا في مصر، مش هغيب عن عينك ليلة واحدة. ابتسمت هناء لأول مرة من سنتين، ابتسامة نورت وشها الصافي ورجعت روحها اللي اتسرقت منها في عز شبابها. ومن ورا القزاز، كان الكلب صابر باصصلنا ونايم في أمان، وكأن الحكاية كلها كانت درس قاسي عشان نعرف إن أصيل الشارع أوفى من قرايب الدم، وإن الحق مهما طال ليله واتسد طريقه بتراب الغيطان.
. لازم في الآخر يرجع لأصحابه، مرفوع الراس ومجبور الخاطر
النقاش
التعليقات والردود (0)
سجّل الدخول للمشاركة في النقاش. تسجيل الدخول
لا توجد تعليقات بعد — كن أول من يشارك رأيه.